Net ien kin krekt fertelle wa't God is. Ast ien tsjinkomst dy't seit dat er it presys útlizze kin, hoechst him net te leauwen. Kinst it bêste earst mar de ferhalen út 'e bibel kennen leare. It binne ferhalen oer de aartsfaders Abraham, Izaäk, Jacob en Joazef, oer Mozes, dy't mei syn folk troch de Reade See hinne gie, oer de keningen Saul en David, oer de profeten Jesaja, Jeremia en Jona en oer Ester. It twadde part, it Nije Testamint, giet oer Jezus en syn freonen en oer Paulus en Johannes. It binne ferhalen oer minsken dy't, elk op syn eigen manier, derachter kamen wat God foar har betsjutte, en dy't hieltyd fernamen dat God oars wie as se tocht hienen.
